Фейсбук тармоғида динимиз Исломни таҳқирлаб, Қуръонни ўзгартириш керак дейишгача ҳад топган, ўзи яхши билмайдиган зардуштийликни ҳақ дин сифатида кўрсатиб, бу таълимотдан бехабар ёшларнинг онгини заҳарлашга ўта айёрона услубда уринаётган анави кимсага нисбатан жўялироқ, ҳақорат аралаштирилмаган, асл ҳақиқатларни очиб берувчи раддия берилармикин дея кўп кутдим. Эҳтимол, шундай раддия берилгандир ҳам, мен бехабардирман (орада бир муддат тармоққа кирмагандим). Аммо ўзим эшитган ва ўқиган раддиялардан кўнгил тўлмади.
Юқорида айтганимдек, бу кимса зардуштийликнинг нима эканини, бу таълимотда қандай қоидалар амал қилганини ўзи ҳам яхши билмаса керак. Ёки, агар била туриб, уни дин сифатида қабул қилган бўлса, унга гапириб ўтириш ҳам ҳайф. Лееин, модомики, шу таълимотдан гап очилиб, орамизда зардуштийликни ёқлайдиган, анави кимсанинг гапларини маъқуллайдиганлар чиқаётган экан, (зардуштийлик ҳақида яхши маълумотга эгаман, дея даъво қилмаган ҳолда), ақли ожизим етган баъзи ҳақиқатларни (билмаганларга) билдиришни ният қилдим.
Биласизларки, бизнинг уламоларимиз мусулмон бўлмаганларни шундай тартиблашади: аҳли китоблар (христианлар ва яҳудийлар), аҳли китоб экани шубҳа остига олинганлар (оташпарастлик) ва ҳавойи нафсига эргашганлар. Анави (номи маълум) кимса лоф ураётган зардуштийлик аслида ана шу оташпарастлик динидаги бир таълимот, яъни, табиатшунос, шоир ва файласуф бўлгани айтиладиган шахс Зардушт Сепитома (Зардўшт ибн Буршаб) асос солган таълимотдир. Ва Зардушт ҳеч қандай пайғамбар эмас! Унинг таълимот асослари баён қилинган «Авесто» ҳам муқаддас китоб эмас! Бу таълимот дастлаб Мазда Ясна дейилган. Ўрта асрлардан бошлаб эса зардуштийлик атамаси қўлланган.
Собиқ совет даврида (коммунистик мафкура талаби билан) одамларга «маҳаллий дин»лар ҳақида атайин эслатиб туриларди, яъни, бош мақсад – Исломни обрўсизлантириш, уни босқинчилар дини сифатида кўрсатиш. Ўша вақтларда мен юқори синф ўқувчиси эдим ва тарих дарслари орқали зардуштийлик ҳақида ҳам маълум маълумотларни олганмиз.
Талабалик даврим мустақилликнинг илк йилларига тўғри келган ва олийгоҳда мен «Авесто»ни «бизнинг муқаддас китобимиз» дея оғиз кўпиртирадиган ёши катта олимларни кўрганман, ўрни келганда улар билан талашиб-тортишганман. Улар ҳам бугунги куннинг «тангричи»ларига ўхшаб зардуштийликни яккахудолик таълимоти дейишарди (ҳозир ҳам зардуштийлик ҳақидаги илмий ва тарихий китобларда шундай ёзилади). Лекин, бу таълимот ҳақидаги асл манбаларда зардуштийлар эзгулик худоси дейдиган Аҳура Мазданинг ёвузлик руҳи Ахриман билан курашда ёлғизланиб қолмаслик учун ўзига ёрдамчи ва йўлдош илоҳларни яратгани айтилади. Яъни, Митра – қуёш худоси, Анаҳита – итоаткорлик худоси, Сароши – интизом худоси, Аши – тақдирни белгиловчи худо… (астағфируллоҳ!).
Булардан ташқари, яна бошқа ёрдамчи илоҳлари ҳам бор, масалан, оловни бошқарадиган Аша Ваҳишита, ерни бошқарадиган Сиэнта Армати, пода ва чорвани бошқарадиган Воҳу Манаҳ, ўсимликлар дунёсини бошқарадиган Амэрэтат ва бошқа бало-баттарлар!..
Шуми яккахудолик?!
Шу ўринда анави (номи маълум) кимса ва бошқа зардуштпарастларга бир-иккита саволим бор.
Биринчи савол: ўлганингиздан кейин жасадингизни итларга едирилишига розимисиз? Агар таълимотингизни яхши билсангиз, нега шундай савол қилганимни тушуниб турибсиз. Чунки, сизларнинг ақидангизда одамнинг ўлиши унинг қазо вақти етганини эмас, ёвуз кучларнинг эзгуликдан устун келганини билдиради. Зардуштийлар бу танага ёвузлик жойлашиб олган, уни муқаддас тупроққа қўйиш мумкин эмас, аввал жасадни тозалаш керак деб ишонганлар ва ўликни кўммасдан, махсус майдонга олиб борганлар. У майдон ҳамиша эркак-аёл, ёш-қари, болаларнинг ярим ғажилган жасадларига тўла бўлган. Чунки, жасадларнинг чириб тозаланишини тезлатиш мақсадида уларни йиртқич ҳайвонларга, кўпинча итларга ғажитишган. Итлар жасадларни уч-тўрт кунлаб ғажиган. Ана ундан кейин қолган суяклар йиғиб олиниб, махсус қудуққа ташланган ёки ассуарий дейиладиган махсус сопол идишга солиниб, ер остидаги наус деб аталадиган иншоотларга кўмилган. Сизнинг ақидангиз, таълимотингиз ўликларни мана шундай хорлайди!
Нафақат ўликлар, ҳатто тирикларни ҳам хорлайди. Масалан, жасадни анави майдонга кўтариб олиб борадиганлар, итлардан қолган жасад суякларини йиғиб, бир идишга соладиганлар ва уларни кўмадиганлар «нотоза» одам ҳисобланиб, жамиятдан буткул ажратиб қўйилган. Уларга ўта паст назар билан қаралган. Улар одамлар фойдаланадиган сув ҳавзаларига, қудуқларга, бозорларга яқин келолмаганлар. Уларнинг соялари тушган нарсалар ҳам ҳаром саналган. Уларга яқин келган бошқа одамлар мураккаб софланиш маросимидан ўтказилган…
Иккинчи савол: хотинингизни бегона эркаклар (дўстларингиз, қўни-қўшнилар) билан бўлишишни хоҳлайсизми? Онангизга ёки синглингизга, ўз қизингизга уйланишни-чи? Нима демоқчилигимни балодай тушуниб турибсиз. Сизларнинг оташпарастлик динингизда моновийлик ва маздакийлик мазҳаблари ҳам бор. Моний ибн Фатак деган биттаси оташпарастлик ва христианлик қоидаларини бир-бирига қориштириб, моновийлик деган мазҳаб яратган ва кўп адашганларни ўз ортидан эргаштирган эди, Баҳром ибн Ҳурмуз деган подшоҳ уни боплаб қатл қилган. Маздакийлик деган мазҳабга асос солган Маздак эса умуман томи кетган одам бўлган (бу жиннини коммунистлар «ер юзида коммунизмга илк асос солган одам» деб ҳам ёзишганди мафкуравий китобларида). Бу мазҳаб қоидасига кўра, ҳамма нарса умумий мулк ҳисобланган, жумладан аёллар ҳам. Маздак ўзини гўё тинчликсевар кўрсатиб, «агар ҳамма нарса – мол-мулк, ер-сув, хотин-қизлар ўртада бўлса, уруш-жанжаллар бўлмайди» деган ғояни илгари сурган ва эркакларга ўз оналарига, сингилларига, қизларига уйланишга ҳам рухсат берган. Бу мазҳаб қоидаларига кўра, хотинини бошқа эркакка «фойдаланишга» бериб турмаган эркак катта гуноҳкор ҳисобланган ва ўлим билан жазоланган. Маздак деган бу нотавонни Исломдан олдинги энг адолатли подшоҳлардан ҳисобланган Анушуравони Одил қатл қилдирган.
Оташпарастларнинг бир кунда беш маҳал ибодат қилганини бизнинг беш маҳал намозимизга муқояса қилаётган ва ундан устун кўраётган кимсага жавоб: сизнинг Аҳура Маздага сиғинишингиз ҳеч қачон бизнинг намозимиз билан тенг бўлолмайди!
Ҳар қандай банданинг олдида иккита йўл бор: бири – Жаннатга, иккинчиси – Дўзахга элтади. Танлов ҳамманинг ўз қўлида. Биз ўз йўлимизни танлаб бўлганмиз. Сиз ҳам ўз йўлингиздан кетинг ва бизнинг эътиқодимизга бурун суқманг!
Дилфуза Комил
Manba: 24soat.com -Saytdan olindi.
Ushbu ma'lumot http://hordiq.uz/ dan olindi!
< ! > DO'STLARINGIZGA YUBORING:
Quyidagi yangiliklarni o'qing dod devorasiz:
2222222
|
