Сирдарё вилоятининг Гулистон шаҳридаги кўп қаватли уйларнинг биридаги хонадонда йигирма ёшли қизнинг жасади қотиллик аломатлари билан топилди. Маълум бўлишича, қиз ўтган йилнинг февраль ойида олий ўқув юртига кириш имтиҳонларига тайёрланиш баҳонасида шаҳарга келган ва шу ердаги хонадонда бир ўзи ижарада яшаб, кафеда официант бўлиб ишлаган.
Марҳумнинг онаси Нодира Козимованинг (исм-фамилиялар ўзгартирилган) таъкидлашича, қизи Ўлмасой Абдуллаева 2019 йилнинг 12 июнь куни Боёвут туманидаги уйига онасидан хабар олгани келади ва эртаси куни ижарада яшайдиган уйига қайтиб кетади. Н.Козимова 14-15 июнь кунлари кечқурун қизига қўнғироқ қилади, лекин телефони ўчирилган эди. Шундан сўнг эртасига она қизи ижарада яшаётган уйга бориб, эшикни тақиллатади, ҳеч ким овоз бермайди. Қизини бирор жойга чиқиб кетган бўлса керак деган хаёлга борган Н.Козимова уни бир неча соат кутиб ўтиради. Аммо дарак бўлмагач, Боёвутга қайтиб кетади.
Шу тариқа она яна кетма-кет икки кун Ў.Абдуллаеванинг ижара уйи эшигига келиб куннинг ярмини қизини кутиш билан ўтказади. Юраги безовталанган она ортиқ чидолмай, уйнинг эгасини чақиртиради ва эшикни очиб беришини айтади. Бахтга қарши уй эгасида ҳам калит йўқ экан. Шундан сўнг улар фавқулодда вазиятлар идорасига қўнғироқ қилиб, эшикни бузиб очиб беришларини сўрашади. Эшик бузиб очилганда эса ичкаридан Ўлмасойнинг жонсиз танаси топилди.
Республика суд-тиббий экспертиза илмий-амалий маркази Сирдарё филиали Ў.Абдуллаеванинг ўлими бўйиннинг сиртмоқ ва қўл билан бўғилиши оқибатида содир бўлгани ҳақида хулоса берди. Демак, қиз қасддан ўлдирилган…
Қотиллик содир бўлган жойдан олинган ашёвий далиллар ва бармоқ излари бўйича икки киши гумонланувчига айланди. Уларнинг бири Ўлмасойнинг унаштирилган қайлиғи, йигирма олти яшар Аҳрор Ибодуллаев бўлса, иккинчиси у билан Гулистон шаҳрида танишган Ботир Холиқов эди. Ўлмасойга ўз қайлиғидан кўра оилали бўлса-да Б.Холиқов яқинроқ эди. У қиз шаҳарга келганидан буён ишга жойлашишида ва моддий томондан ёрдам бериб тургани боис Ўлмасойнинг ишончига кирганди. Ҳатто уйнинг ижара ҳақини ҳам икки ой давомида Ботир тўлаганди. Албатта, бу бежиз эмас, гоҳида бўлиб турадиган ишқий муносабатлар эвазига эди.
Ў.Абдуллаева қайлиғи А.Ибодуллаев билан шу уйда танишганди. Аҳрор мардикорлик қилиб кунини ўтказарди. У илгари бир неча марта судланган эди. Қиз ижарада турган уйнинг ташқи томонини бўяб беришни зиммасига олган ташкилот Аҳрорни ҳақ эвазига бу ишга ёрдамчи сифатида ёллайди. Усталарга шу уйда яшайдиган фуқаролар навбати билан тушлик тайёрлаб беришади. Навбати келганда Ўлмасой ҳам усталарга овқат қилиб беради.
Шу жараёнда қиз Аҳрор билан гапи-гапига қовушиб, яқин бўлиб қолади. Қизнинг меҳрини қозониш учун йигит ижара уйдаги кичик таъмирлаш ишларини раҳматга қилиб бераверарди. Шу аснода йигит қизни ёқтириб қолади. Қиз ҳам унга рўйхушлик беради. Йигит қизга совчи қўяди ва икки томоннинг розилиги билан улар 2019 йилнинг март ойида унаштириб қўйилади. Аммо тўй куни белгиланмайди.
Тергов жараёнида маълум бўлишича, гумондорлардан бири Б.Холиқов қотиллик содир бўлган куни уйида бўлган. Қолаверса, ашёвий далиллар иккинчи гумондор бу воқеага кўпроқ алоқадорлигига ишора қиларди. Шунинг учун ҳам дарҳол А.Ибодуллаев қидирила бошланди. Орадан икки кун ўтиб, у қўлга олинди. Аҳрор тергов жараёнида бу қотилликни содир қилганига иқрор бўлди.
Маълум бўлишича, йигит ва қиз унаштирилгандан кейин доимий мулоқотда бўлиб туришган. Кунларнинг бирида Ў.Абдуллаева унга қўнғироқ қилиб, Туркияга кетиш учун виза қилаётганини, ишлаб пул топиши кераклигини, онасига уй сотиб олиши лозимлигини айтади. Аҳрор эса унга қўшни туманда тўрт хонали квартираси борлигини, агар керак бўлса, ушбу уйни онасининг номига ўтказиб беришини, хорижда ишлашга ҳожат йўқлигини билдиради. Ў.Абдуллаева унга жавобан «Уйингизни онамнинг эмас, менинг номимга ўтказиб берасиз» дейди.
Аҳрор бунга ҳам рози бўлади. Аммо қиз фикридан қайтмайди. Ҳатто бу йўлда ундан ҳам воз кечишини айтади. Шундан сўнг йигитда қизга нисбатан нафрат уйғонади ва уни ўлдиришни режалаштиради. А.Ибодуллаев 2019 йил 14 июнь куни соат 21:30 ларда чўнтагига синтетик ип солиб Ў.Абдуллаева яшаб турган хонадонга келади. У билан охирги марта гаплашиб, фикридан қайтаришга ҳаракат қилади. Лекин Ўлмасойни кўндира олмайди. Шундан сўнг тунги соат иккиларда ухлаб ётган Ў.Абдуллаевани ип билан бўғиб ўлдиради.
Кетар чоғида эса марҳумга тегишли тилла зирак, занжир, телефон аппаратини, 48000 сўм пулини, паспорти, туғилганлик ҳақидаги гувоҳномаси, мактабни тамомлагани ҳақидаги шаҳодатномасини олиб чиқиб кетади. Далага чиқиб Ў.Абдуллаеванинг ҳужжатларини ёқиб юборади. Сўнг бозорга боради ва унга тегишли тилла буюмларни 2 млн. 400 минг сўмга сотиб, маишат қилиб юрганида ички ишлар идораси ходимлари томонидан қўлга олинади.
Суд Аҳрор Ибодуллаевни ўн саккиз йил муддатга озодликдан маҳрум қилди.
Manba: 24soat.com -Saytdan olindi.
Ushbu ma'lumot http://hordiq.uz/ dan olindi!
< ! > DO'STLARINGIZGA YUBORING:
Quyidagi yangiliklarni o'qing dod devorasiz:
2222222
| 
