ЯНГИ «ХАЛИФАТ»
2014 йил июнида дунёда фаолияти тақиқланган «ИШИД» жангарилар гуруҳи кетма-кет Ироқдаги шаҳарлар, қишлоқларни эгаллай борди. Маҳаллий салафизм фанатлари, Саддам Ҳусайн армиясининг собиқ офицерлари, аскарлари оммавий тарзда жангарилар гуруҳига аъзо бўла бошлади. Мосулни қўлга киритгач, яқинда рақобатчилар назар-писанд қилмай келган бу гуруҳ дафъатан ўз хоҳиши билан «Халифат» тузганини эълон қилди. Бу халифатга халиф Иброҳим, яъни, ўша Бағдодий Халиф этиб тайинланди. Бағдодий дарҳол ҳаракатга тушиб, Мосул шаҳридаги ан-Нурий мачитида ваъз ўқиди ва маҳаллий мусулмонларни халифатга қўшилишга чақирди. «Халифат»ни эса қатъий равишда «Ислом давлати» деб атади.
Бу халифатнинг ташкил этилиши террор оламидагиларни жунбушга келтирди. Ҳатто, шундай халифат ташкил этиш, дунёга ҳукмронлик қилиш ҳақида орзулаган каллакесар бин Ладен, «Аль-Қоида»нинг бошқа етакчилари очиқчасига қўрқиб қолишди.
Бироқ ислом дунёси Бағдодий тузган халифатни тан олишни хоҳламади. Бунинг сабаби ойнадек равшан. Халифат ҳеч қачон худонинг хоҳишига қарши борган ҳолда, бегуноҳларнинг қонини тўкиш, зино, шафқатсизлик бошқа шу каби гуноҳларга йўл қўйиш орқали тузилмайди.
Шунга қарамай, террор фанатлари Сурияда ҳам, Ироқда ҳам етарлидан-да кўпроқ эди. Улар эса майда-майда террор гуруҳларига бўлинган ҳолда гуноҳ қилишда давом этишарди. Бағдодийнинг ҳаракатларидан сўнг улар бирлашишни хоҳлаб қолишди.
«Халифат» эълон қилингач, орадан 4 ой ўтиб Ливиядаги террор гуруҳларидан бири жангарилари келиб Бағдодийга содиқ хизмат қилишга қасам ичди. Уларнинг ортидан яна бир «Ансар Байт аль-Макдис» жангарилар гуруҳи келиб қўшилди. Бу гуруҳ жангарилари ўша пайтгача Синай ярим оролида каллакесарлик билан шуғулланиб келганди.
Дунёда фаолияти тақиқланган «ИШИД» жангарилар гуруҳининг номи Африкагача етиб борди. 2015 йил мартида Нигериядаги «Боко Ҳаром» террор гуруҳи Бағдодий қаноти остига кирди. Орадан бир йил ўтиб «ИШИД» дунёнинг 11 та мамлакатида иттифоқдош ва фанатларга эга бўлди.
Бағдодий Ироқ ва Суриядаги хунрезликларни бир неча юз баробар ошириб, гўё шу йўл билан Ислом қоидаларини тиклай бошлади. Бунинг оқибатида иккала давлатдаги тарихий ёдгорликлар йўқ қилина борди. Қисқа вақт ичида тарихий обидалар, бутун бошли ибодатхоналар, мачитлар вайронага айланди. Жангари каллакесарлар ҳатто суннийлар мачитларини бузиб, қўлга илинган қимматбаҳо буюмларни ташиб кета бошлади.
КАЛЛАКЕСАРЛИК НАМОЙИШЛАРИ
Бағдодийга булар ҳам камдек туюлаверди. У қўрқитиш, бўйсундиришнинг янги-янги усулларини ўйлаб топиб бутун дунёда янада машҳур бўлишни хоҳлайверди. Шу йўлда энди қўлга олинганларнинг бошини танасидан жудо қилиш палласини видеотасмага ёздириб интернет сайтларга тарқаттиришга тушди. Бунга Сурия ва Ироқдаги насронийларга, сунний мазҳабидаги мусулмонларга тегишли ибодатхона, ёдгорликлар, черковларни бузиш жараёнини ҳам тиркаб қўйди.
Жангарилар ўзи назорат остига олган ҳудудларда собиқ ҳукумат вакилларининг компьютерлари ёрдамида ҳар бир фуқаро ҳақида алоҳида маълумотга эга бўлди. Назорат ўтиш жойларидан ўтаётганларнинг шахсни тасдиқловчи ҳужжати компьютердаги маълумот билан солиштириб кўрила бошланди. Агар бу фуқаро собиқ хавфсизлик хизмати вакили бўлса, уни жангарилар олдиндан танлаган мачитларга олиб бориб тавба қилдирар, томоғига тиғ тираб Бағдодийга қасамёд қилдирарди. Шундан кейингина уларга махсус маълумотнома бериларди.
— Дастлаб ҳаммани оммавий тарзда мачитга олиб бориб ўз томонига оғдиришарди, — дейди Мосулда яшовчилардан бири. — Кейин ҳаддиларидан оша бошлашди. Агар олдин аёллардан фақат рўмолда юришни талаб қилишса, кейинчалик паранжи кийишга мажбурлашди. Эркакларнинг соқол қўйиши шарт деб қўйилди. Соқолсиз ҳолда жангарилар қўлига тушсангиз, сўраб ўтирмай сўйиб кетаверишди. Тамаки маҳсулотлари, қўл телефондан кўчада фойдаланиш, кафеларга кириш, фазовий телевидение хизматидан фойдаланиш тақиқланди. Жангарилар хизматига ўтган полициячилар уззукун кўча кезиб қоидабузарларни тутадиган бўлди…
— Уларнинг ўз суди, судьялари, маълумотлар базаси бор эди, — дейди яна бир Мосул фуқароси. — Агар турмуш ўртоғига хиёнатда айбланса, бу эркакми, аёлми, барибир тошбўрон қилиб ўлдириларди. Ўғриларнинг қўлини кесишарди. Ҳезалакларни баланд бино томидан ерга улоқтиришарди. Жосусликда айбланганларни сўйишарди ё отиб ўлдиришарди…
Афсуски, дунёда фаолияти тақиқланган «ИШИД» жангарилар гуруҳининг бу каби ишлари хўжакўрсингагина эди. Улар тарафидан содир этилган ва содир этилаётган террор ҳаракатлари, хунрезликлар юқорида таъкидланган амалларни сира оқлай олмайди. Чунки террорчилар шу кунга қадар миллионлаб бегуноҳларнинг қонини тўкди ва тўкмоқда. Улар содир этган зино, наркотик моддалар савдоси, истеъмоли, гўдакларни чирқиратиб, тирик етимга айлантириш, ҳали дунёни таниб-танимаган гўдаклар қўлига қурол тутқазиб одам ўлдиришга мажбурлаш, уларни қул қилиб ишлатиш ва шу каби қатор ножўя ишлар худонинг қаҳрини келтирса, тезроқ каллакесар жангариларни ер ютса кошкийди.
(давоми бор)
Manba: 24soat.com -Saytdan olindi.
Ushbu ma'lumot http://hordiq.uz/ dan olindi!
< ! > DO'STLARINGIZGA YUBORING:
Quyidagi yangiliklarni o'qing dod devorasiz:
2222222
| 
