Ҳамма хато қилиши табиий, лекин шундай хатолар борки, вақт ўтиб улар таҳлил қилинганда «тил тишлаб қолиниши» мумкин. «Яндекс Дзен» платформасида эълон қилинган Болливуд юлдузлари ижро қилишдан бош тортган роллар бунинг яққол мисоли.
Шоҳрух Хон икки маротаба Оскар мукофотидан бебаҳра қолган. Бунга «Бир куни Ҳиндистонда» (Lagaan) ва «Харобадан чиққан миллионер» (Slumdog Millionaire)даги қаҳрамон ролини ўйнаш таклифини рад қилгани сабаб бўлган. Бундан ташқари, актёр «Муннабой» фильмидаги бош қаҳрамон ролини ижро қилишдан ҳам бош тортган.
Салмон Хон карьераси давомида қуйидаги омадсиз қарорларни қабул қилмаганида Болливуд қироли бўлган бўларди. У «Фирибгар» (Baazigar) фильмида роль ижро қилиш таклифини рад қилган ва ушбу роль Шоҳрух Хонга насиб қилган. Агар актёр яхшилаб ўйлаб кўриб кейин қарор қилганида эди, биз «Ўткинчи дунё» (Kal Ho Naa Ho) фильмидаги Саиф Али Хон ролида Салмон Хонни кўришимиз мумкин бўларди. Унинг яна бир нотўғри қарори «Олға, Ҳиндистон» (Chak De India) фильмида роль ўйнашдан бош тортгани бўлган.
Амир Хон карьерасидаги хато қарорлар бошқа юлдузларники каби кўп эмас. Актёр 90 йилларда экран юзини кўрган «Қўрқув» (Darr) фильмидан тушган таклифни рад қилган.
Карина Капур сўнгги вақтларда ажойиб ролларни танлаётган бўлса-да, карьерасида бир неча марта нотўғри қарор қабул қилган. «Севаман, деб айт» (Kaho Naa Pyaar Hai) фильми бунинг яққол мисоли. Агар «Ўткинчи дунё» фильмида ўйнашдан бош тортмаганида, Прити Зинта ролида Каринани кўрган бўлардик. Шунингдек, актриса Page 3 ва «Рам ва Лила» фильмларида иштирок этишни истамаган.
Ритик Рошан ҳам юқоридаги ҳамкасбларидан қолишмайди. У дўсти Фархан Ахтарнинг дебют фильми «Орзуманд юраклар» (Dil Chahta Hai)да роль ўйнашдан бош тортган. Режиссёр Ашутош Говарикернинг «Ватанга қайтиш» (Swades) фильмида бош қаҳрамонни жонлантиришни истамагани актёр карьерасидаги энг катта хато бўлган. Қолаверса, Ритик «Заъфарон ранги» (Rang De Basanti) ролидан ҳам бош тортган.
Акшай Кумар «Фирибгар» ҳамда «Мақбул» (Maqbool) фильмларида роль ижро этиш таклифини қабул қилмаган.
