Турк киноижодкорларининг «Муҳташам юз йил» сериалини томоша қилганлар шаҳзода Салимни жуда яхши билади. У охир оқибат 1566 йили отаси султон Сулаймоннинг ўлимидан сўнг империя тахтини эгаллади. Бироқ давлатни амалда бош вазир Мехмед Соқолли пошша бошқаргани тарихий манбаларда аниқ кўрсатиб ўтилган. Отасидан фарқли ўлароқ, султон Салим ҳарбий юришларда иштирок этмаган. Бунинг ўрнига пиёнисталикка, ҳуру-ғилмонлар айш-ишратига берилган. Соқолли пошша билан бир вақтда империяни Салимнинг канизаги, кейинчалик Хуррам султон каби подшоҳ билан қонуний эр-хотин бўлиш бахтига эришган Нурбону султон идора этган. Қарангки, Салим ҳарбий юришларда иштирок этмаган бўлса-да, унинг армияси кўплаб ҳудудларни босиб ола билган. Тунис, Яманистон, кейинроқ Кипр ороли ҳам айнан султон Салим даврида империя таркибига қўшиб олинган.
Аммо Волга, Дон дарёларини Қора денгиз билан бирлаштириш бахтига муяссар бўла олмаган. Негаки, рус қўшинлари усмонийлар империяси армиясидан устун эканини амалда исботлаган. Дастлабки мағлубиятдан кейиноқ султон Салим армияси русларга қарши ҳарбий ҳаракатлар содир этишни таққа тўхтатган.
Тарихий манбаларда таъкидланишича, султон Салим ва Нурбону султон никоҳда 11 фарзанднинг ота-оналари бўлишган.
Султон Салим II 1574 йил 15 декабрда оламдан ўтган. Тарихий маълумотларда у ҳаммомда маст ҳолатда бўла туриб чўмилаётган маҳал чўкиб кетиш оқибатида 51 ёшида вафот этгани кўрсатиб ўтилган.
Салимнинг ўлимидан кейин тўнғич ўғли шаҳзода Мурод империя тахтини эгаллаган. Ўшанда у Манисада санжакбей сифатида фаолият юритарди. Мехмед Соқолли Мурод Манисадан пойтахтга келгани ҳамоно уни султон дея эълон қилган. Ўша куни кечаси Муроднинг туғишган укалари шаҳзода Абдулла, Жаҳонгир, Мустафо, Усмон ва Сулаймонлар қатл этилган.
