Yaqinda Qirg'iziston sobiq prezidenti Olmosbek Otamboyev tarafdorlari va jurnalistlar uchun brifing tashkil etib, aynan shu haqda to'xtalib o'tdi. Otamboyevning gapiga qaraganda, agar huquqni muhofaza qilish tashkiloti vakillari uni hibsga olishga urinsa, o'sha zahoti joniga qasd qiladi. O'zini otib o'ldiradi.
Otamboyev yangi hukumat qaroriga qarshilik ko'rsatishning yana bir turini aytib o'tdi. Agar tarafdorlari miting uyushtirishsa, o'zini himoya qilish uchun o'sha mitingda faol ishtirok etarkan.
Eslatib o'tamiz, yaqinda Qirg'iziston respublikasi parlamenti Otamboyevni sobiq prezident hamda dahlsizlik statusidan mahrum etdi. Bu sobiq prezidentga nisbatan yangi jinoiy ish ochish imkonini beradi. Huquqni muhofaza qilish tashkiloti vakillari esa Otamboyevni qo'lga olish huquqiga ega bo'lishadi.
Sobiq prezident Olmosbek Otamboyev mamlakat jinoyat majmuasining to'qqizta moddasiga asosan aybdor deb topilgan. Masalan, uni Rossiya fuqarolariga, jumladan, uyushgan jinoiy guruhlarga qurol sovg'a qilganlik, Yer uchastkasini noqonuniy tarzda o'zlashtirish, jinoyat olami avtoritetlaridan biri Aziz Batukayevning turmadan ozod etilishiga dahldorlik, qo'shimcha daromadlarini sir tutish, Bishkek TES modernizatsiyasi doirasida korrupsiya jinoyatlarini sodir etishda ayblashmoqda. Sobiq prezident yuqorida ko'rsatib o'tilgan jinoyatlarni bo'yniga olsa, u bir umrga ozodlikdan mahrum etiladi.
Otamboyev Qirg'iziston prezidenti sifatida 2011 yildan 2017 yilga qadar faoliyat yuritgan. U mamlakat tarixida dastlabki muddat tugagandan keyin ko'ngilli ravishda prezidentlik kursisini tark etgan birinchi rahbar hisoblanadi.