Bundan bir qancha vaqt oldin olimlar «sayyorani saqlab qolishga 12 yil vaqtimiz bor» deya ta'kidlar edilar. Endilikda, kelasi 18 oy Yerni iqlim o'zgarishi asoratlaridan asrash yo'lida o'ta muhim bo'lishi aytilmoqda.
O'tgan yili tadqiqotchilar sayyoradagi haroratni hayotiy muhim me'yorda ushlab turish uchun atmosferaga chiqarilayotgan is gazi miqdori 2030 yilga qadar 45 foizga kamaytirilishi zarurligini bildirgan edi.
Ammo bugun kuzatuvchilar bu maqsadga erishish yo'lida kelasi yilning so'ngiga qadar yetarli va qat'iy siyosiy iroda ishga solinishi shartligini e'tirof etmoqda.
«Agar dunyoni kelayotgan bir necha yil ichida davolamasak, u bee'tiborlik tufayli 2020 yilgacha og'ir jarohat olishi mumkin», deydi Potsdam Iqlim Instituti asoschisi va faxriy direktori Hans Ioaxim Shelnhuber.
Ekspertlar 2020 yilning yakuni iqlim o'zgarishi asoratlarining oldini olib qolish uchun so'nggi imkoniyat ekanini ta'kidlamoqda.
Nega kelayotgan 18 oy bunchalik muhim? 2015 yil dekabrida Parij global iqlim kelishuvi imzolanganiga qaramay, davlatlar uning talablariga rioya qilmayotgani qoralanadi.
O'tgan yili e'lon qilingan hisobotda sayyoradagi havo haroratini Selsiy bo'yicha 1.5 darajadan pastda ushlab turish uchun 2020 yilga borib atmosferaga chiqarilayotgan is gazi miqdori keskin qisqartirilishi zarurligi ta'kidlangan edi.
Biroq hozirda ushbu ogohlantirishga hech kim jiddiy e'tibor qaratmayapti.
Agar o'z vaqtida choralar qo'llanmasa, 2100 yilga kelganda, jahondagi o'rtacha havo harorati 1.5 emas, balki halokatli 3 barobarga isib ketadi.
Shu sababdan is gazi miqdorini 2030 yilga qadar 45 foizga kamaytirish bo'yicha rejalar 2020 yil oxiridan kechiktirilmay ishlab chiqilishi talab etiladi.
Choralarni ishlab chiqish yo'lidagi ilk qadam BMT Bosh Kotibi Antoni Guterresh tomonidan 23 sentyabr kuni Nyu Yorkda o'tkazilishi rejalashtirilgan sammit bo'ladi.
Janob Guterresh davlatlardan is gazini qanday kamaytirish bo'yicha takliflarni kutmoqda.
Britaniya esa 2020 yil so'ngida iqlim o'zgarishiga bag'ishlangan eng muhim xalqaro uchrashuvga mezbonlik qilish va o'zining sayyorani saqlab qolish maqsadida qanchalik qat'iy ekanini ko'rsatib qo'yishni ko'zlamoqda.
So'nggi paytlarda odamlar iqlim isishiga qarshi jiddiy choralar ko'rishni talab etmoqda. Ko'plab mamlakatlarda oddiy fuqarolar siyosatchilarni harakat boshlashga majbur eta olgan.
Amerikalik siyosatchilar mamlakat iqtisodiyotini iqlim o'zgarishiga butunlay moslovchi «yashil yangi kelishuv» g'oyasini ilgari surmoqda. Bunday g'oya atigi bir necha yil avval ham imkonsizdek tuyilar edi.
Buyuk Britaniya 2050 yilga qadar atmosferaga zararli gazlarni chiqarishga butkul chek qo'yishga ahd qilgan.
Shahzoda Charlz esa kelayotgan 18 oyning hayotiy muhimligini e'tirof etayotgan ekspertlarni qo'llab-quvvatlagan.
Iqlim o'zgarishi asoratlari faqat insoniyatning o'ziga ta'sir ko'rsatibgina qolmaydi.
Turli hisobotlar odamzot tomonidan yovvoyi tabiatning ulkan qismiga o'nglab bo'lmas zarar yetkazilayotganini ko'rsatib bermoqda.
Olimlar kelayotgan o'n yilliklar ichida bir millionga yaqin mavjudot turlari butunlay yo'qolib ketish arafasida turganidan ogohlantirmoqda.
Ushbu muammo bo'yicha bir qancha davlatlar vakillari kelasi yili Xitoyda uchrashib, barcha turdagi jonzotlarni saqlab qolish yo'llarini muhokama etmoqchi.
BMTning Bioxilmaxillik bo'yicha Konvensiyasiga esa 2030 yilgacha yovvoyi tabiatni asrab qolish choralarini ishlab chiqish vazifasi yuklatilgan.
Xulosa qilib aytganda, ona sayyoramizni muqarrar halokatdan qisqa vaqt ichida saqlab qolish muammosi bilan yuzlashgancha turibmiz. Biroq siyosat bu yo'ldagi asosiy to'g'onoq o'laroq qolmoqda.
Manba: 24soat.com -Saytdan olindi.
Ushbu ma'lumot dan olindi!
< ! > DO'STLARINGIZGA YUBORING:
Quyidagi yangiliklarni o'qing dod devorasiz:
2222222
| 
