Андижондаги 2- туғруқхона фарроши 33 ёшли Одина Эргашеванинг айтишича, 6 июнда уни милиция ходимлари ҳуқуқни муҳофаза қилиш ташкилоти кўрсатмаларига бўйсунмагани, милиция ходимига қўл кўтаргани сабабли ҳибсга олишган. Шаҳар ички ишлар бошқармасига олиб боргач, бу аёлни шафқатсизларча калтаклашган. Аниқроқ айтганда, туғруқхонадаги аёллардан бирининг қўл телефони йўқолиб қолган. Ўша кеча Одина навбатчиликда қолгани сабабли, милиция ходимлари ундан гумонсирашган. Хуллас, аёлнинг айтишича, шаҳар ички ишлар бошқармасида уни ароқ ичишга ҳам мажбурлашган.
Бироқ Андижон шаҳар ички ишлар бошқармаси вакили таъкидлаганки, Одина Эргашева қўлга олиш чоғида икки нафар милиционерга қўл кўтарган. Уларнинг погонларини юлиб олиб, кийимларини йиртиб ташлаган.
33 ёшли бу аёл майда безорилик ва ҳуқуқни муҳофаза қилиш ташкилоти ходимининг талабларини бажармагани сабабли маъмурий жавобгарликка тортилган. Яъни, 10 кун муддатга озодликдан маҳрум этилган.
Одина Эргашеванинг онаси Маъсуда Эргашева шундай дейди:
Қизим эри билан ажрашган. Бир боласини ўзи вояга етказмоқда. Ўшанда қўшимча маош олиш ниятида дам олиш куни навбатчиликка кетганди. Қизим туғруқхонада фаррош бўлиб ишлайди. Шу навбатчилигида Нафиса Усмонова деган аёлнинг қўл телефони йўқолиб қолибди. Аёл буни қизимдан кўрган. Милиция чақирган. Милиционерлар Одинани бошқармага олиб кетган. Ўша ерда қизимни калтаклашган…
Жамила исмли қариндоши ҳам бу фактни тасдиқлаб, ўша куни Одина навбатчиликдан эзилган ва ҳаммаёғи кўкарган ҳолда уйга келганини айтиб ўтган.
— Унинг ҳаммаёғи кўкариб кетганди, — дейди Жамила. — Йиғлаб нима бўлганини гапириб берди. Уни аёвсиз калтаклашибди, ароқ ичишга мажбурлашибди…
Фожиага қоришиқ воқеа содир бўлгандан кейин Одина Эргашева тошкентлик ҳуқуқ ҳимоячиси Елена Ўрлаевага ёрдам сўраб мурожаат қилган. Елена унга барчасини видеотасмага жойлаштириш ва омма эътиборига ҳавола этишни ўргатган.
— Бошқармада, — дейди Одина Эргашева видеомурожаатида. — 4-бўлим бошлиғи ва тергов бўлими бошлиғи ерёнғоқ еб ўтиришарди. Улар ҳамкасбларига мени қандай калтаклашни ўргатиб туришди.
— Шундай урингки, из қолмасин, — дея ўргатишди улар. Уч милиционер эса улар ўргатгандек мени чарм таёғи билан калтаклади.
Одина Эргашеванинг гапига кўра, калтаклашлардан кейин милиция ходимлари уни ароқ ичишга мажбурлашган.
— Улар бўйнимдан маҳкам сиқимлашди-да, — деди Одина Эргашева. — Оғзимга қандайдир аччиқ суюқлик қуйишди. Нималигини сўраганимда, бу ароқ эканини, ичишим шартлигини айтишди…
Кейинчалик туғруқхона ходималаридан бири йўқолган телефон топилганини баён қилди. Телефон шкафнинг орқасига тушиб кетган экан. Бу фактни Андижон шаҳар ички ишлар бошқармасидагилар ҳам тасдиқлашди. Лекин улар барибир Одина Эргашевани милиционерларга қўл кўтарганликда айблади. Буни туғруқхона бўлим мудираси ҳам тасдиқлади.
— Одина милиционерларнинг погонларини юлиб ташлади, — деди мудира. — Уларнинг дуч келган ерини тирмалаб, кўйлак, майкаларигача йиртиб ташлади. Милиционерлар бунга жавобан ҳеч қандай ҳаракат содир эта олишмади. Мен аёл сифатида бу манзарани кўриб шармандаликдан ўлай дедим. Ахир, милиционер эркак киши бўлса. Эркакка қўл кўтарадими одобли аёл?!.
Одинанинг қариндоши Жамила эса мудиранинг гапларини кескин рад этди.
— Одина озғингина, заифгина аёл, — деди Жамила. — Шундай басавлат милиционерларни қандай калтакласин? У атиги 50 кило вазнга эга. Одина ўз ҳуқуқларини талаб қилиб пича овозини кўтарган ҳолда гапиргани учун милиционерлар наряд чақириб уни олиб кетишди. Бошқармада калтаклаб, кейин қўйиб юборишди. Одина у ердан келибоқ Тошкентга жўнаган. Милиционерлар эса орқасидан одам жўнатган. Улар Одинани ортга қайтариб келишгач, уни 10 кун муддатга озодликдан маҳрум этишган.
Сўнгги маълумотларга қараганда, телефонини йўқотиб, Одина Эргашевани ўғирликда айблаган аёл ундан узр сўрашга тайёр. Уёғи нима билан якун топган ёки топади, ҳозирча маълум эмас.
Шу мавзуга оид янги маълумотлар пайдо бўлса, албатта сиз азиз мухлислар эътиборига ҳавола этамиз.
Manba: 24soat.com -Saytdan olindi.
Ushbu ma'lumot dan olindi!
< ! > DO'STLARINGIZGA YUBORING:
Quyidagi yangiliklarni o'qing dod devorasiz:
2222222
| 
